Прэзентацыя выставы

Новы год у раённым Доме рамёстваў пачаўся з цікавай падзеі – прэзентацыі выставы мясцовых мастакоў пад назвай “Лепельшчына любімая мая…” На ёй майстры пэндзля прадставілі свае карціны, якія былі створаны імі ў час сумесных пленэраў – выездаў у розныя маляўнічыя, звязаныя з выдатнымі гістарычнымі і культурнымі падзеямі, нечым важным адметныя месцы нашага роднага краю.

Першы пленэр адбыўся ў жніўні 2009 года ў ваколі­цах возера Лепельскае. Увосень таго ж года прайшоў яшчэ адзін пленэр у вёсцы Таронкавічы, паблі­зу помніка архітэктуры — бровара XIX стагоддзя, які ўзведзены з рознакаляровых, прыгожа апрацаваных камянёў. Незабыўнае ўражанне засталося ў мастакоў і ад наведвання вялікага, так званага рабінавага каменя і мясцовага сярэдневяковага помніка гісторыі – могільніка з каменнымі крыжамі.

Вясной 2010 года мастакі прынялі ўдзел у трэцім пленэры — ў вёсцы Верабкі, праз якую праходзіў суднаходны канал Бярэ­зінскай воднай сістэмы, што злучае рэкі Бярэзіна і Заходняя Дзвіна.

— Ніякія, нават высакаякасныя сучасныя фотаздымкі не заменяць карціны мастакоў, створаныя імі на аснове, здавалася б, зусім аднолькавых прыродных ландшафтаў і размешчаных на іх архітэктурных пабудоў, — адзначыла дырэктар раённага Дома рамёстваў Алена Барадзейка. – Справа ў тым, што ў кожнага майстра выяўленчага мастацтва як у творчага чалавека ёсць сваё, асабістае бачанне навакольнай рэчаіснасці, якое ён прапускае праз уласныя душу і сэрца, так на свет з’яўляюцца творы мастацтва, што ўражваюць сваёй адметнасцю, непаўторнасцю.

Шматлікія наведвальнікі выставы міжволі параўноўвалі некаторыя, зусім аднолькавыя па назве карці­ны мастакоў, якія былі намаляваны ў час пленэраў, іх вельмі здзіўляла, што гэтыя творы выяўленчага мастацтва па-сутнасці аказваліся зусім рознымі па зместу і творчаму ўвасабленню. Напрыклад, пад назвай “Залатая восень” былі прадстаўлены карціны мастакоў Івана Будзіча, Аляксандра Саўчанкі, Уладзіміра Пшонкі, Леа­ніда Масцінскага і Паўла Жарнасека. І, тым не менш, кожны з гэтых твораў зусім розны, па-свойму цікавы і незабыўны, яскрава сведчыць аб багатым унутраным свеце кожнага дойліда, яго  жыццёвых перакананнях і своеасаблівых уяўленнях аб прыгожым.

Мікалай ГАРБАЧОЎ.